Friday 18 October 2013

Tallow Chandlers Company, 1456

A tous presens et advenir qui ces presentes lettres verront ou orront Iehan Smert autrement dit Gartier Roy Darmes du Royaume Dangleterre salut. & toute humble recommendacion. En toutes regions royaumes & pays aeste de tous temps et encores est depresent notoirement use & acoustume que principalment et en chief les Citez bonnes & notables communaultez et consequement les compaignies et fraternitez des marchans artificiers & mestiers et chacune diceulx separeement et aparsoy ont enseignes en signe de nobles armes et de blazon separees les unes des autres pour mettre en leur seel dont ilz ont acoustume de user en leurs communs affaires et semblablement en bannieres estandars & pennons quilz portent en mettent avant en leurs notables festes et assemblees tant en sainte eglise pour venerer et decorer les lieux ou est fait & celebre le divin service et en leurs manoirs & lieux communs ou ilz tiennent leurs communicaccons & consaulx comme en ostz et chevauchees darmes quant le cas le requiert. Ores est vray que Iohn Priour Iohn Thirlow William Blakman & Richard Grenecroft Gardiens jurez et plusieurs autres notables hommes du mestier & de la compaignie des Chandeliers de Suyf en la Cite de Londres sont venuz par devers moy le dit Gartier pour et au nom de toute leur confraternite Disans que leur dit mestier est lun des membres dicelle Cite aiant Gardiens jurez & autres officiers auctorisez de faire constituer et mettre entre eulx regles & bonnes ordonnances sur le fait dicellui mestier toute separeement des autres. Pour laquele chose besoing leur est davoir en et pour icellui mestier ainsi que ont les autres compaignies & mestiers de la dite Cite leur armes enseignes et blason distingueement apareulx et separez des autres dont jusques a present nont eu aucune provision. requerans icelle avoir par moy ledit Roy Darmes tres affectueusement et a grant instance. Pourquoy moy considerant leur desir estre honneste & honnourable par vertu de lauctorite et pouvoir annexez et attribuez a mon dit office de Roy Darmes. Ay devise ordonne et assigne a la dite compaignie et confraternite des Chandeliers de Suyf en la dite Cite de Londres pour eulx et leurs successeurs conjointement a tousjours les enseignes armes et blason en la maniere qui sensuit. Cest assavoir ung escu de siz pointz dasur et dargent a trois coulombs de mesmes membrez de gules portans chacun en son bec ung ramceau dolive dor. Et le tymbre sur le heaulme ung Angel assis sur une nuee entretenant la teste de Saint Iehan Baptist en une plateyne dor les elles & garnissure de mesmes emmantele de gules double dermines sicomme la picture en la marge cy devant le demo...estre. En Tesmoing de ce je Gartier Roy Darmes dessusnomme ay signe de ma main et seelle de mon seel ces presentes. Fait et donne le xxiiij jour de Septembre Lan de Grace mil. cccc. cinquante six. J Garter

Heralds Commemorative Exhibition: 1484-1934 (London: Tabard Press, 1970)


No comments:

Post a Comment